Bu gün şahyr Seýitmyrat Geldiýew 42 ýaşaýar.

Seýitmyrat Geldiýew 1980-nji ýylyň 18-nji iýunynda Mary welaýatynyň Mary etrabynyň Babadaýhan daýhan birleşiginde dogulýar. 2013-nji ýylda Magtymguly adyndaky Türkmen döwlet uniwersitetini žurnalist hünäri bilen tamamlaýar. Talyp ýyllarynda iki gezek «Türkmeniň Altyn asyry» bäsleşiginiň ýeňijisi, ylmy işler boýunça bäsleşigiň ýeňijisi, Ýaşlar baýragynyň eýesi bolýar, «Nesil» gazetiniň poeziýa bölüminiň redaktory, şeýle-de «Ýaşlyk» teleýaýlymynda «Ganatly galam» döredijilik gepleşiginiň redaktory we alyp baryjysy bolup işleýär.
Ol uniwersiteti tamamlansoň «Altyn asyr: Türkmenistan» teleýaýlymynda we «Edebiýat we sungat» gazetinde işledi. Häzirki wagtda «Biznes reklama» gazetiniň Baş redaktory.

Menem Seýitmyrat agany täze ýaşy bilen gutlaýan. Ömri uzak, jany sag, maşgalasy bitin, işleri, döredijiligi hem üstünliklere baý bolsun. Ýaş döredijilere edýän kömekleri, berýän şahsy goldawlary üçinem minnetdarlyk bildirýäs.

Doglan günüm, doglan günüm,
Elmisakdan kowlan günüm.

Ak gundagda ýatan günüm,
Agyr borja batan günüm.

Wagty sagat çekdi gitdi,
Batareýler çökdi gitdi.

Ynha, inden Adam ataň
Ýaşyndakam uly hatam,

Ötülmejek günäm bar deý,
Barýar jiger eräp gar deý.

Ýorgudy kyn düýşe girdim,
Haky pynhan işe girdim.

Galam aldym ujy demir,
Syýa aldym içi kömür.

Bir gyz boldy bar meseläm,
Bagtsyzlygma bu ne sebäp?!

Doglan günüm sadadym men,
Ýamansyrap ýadadym men.

Ýolda galmaz öljek günüm,
Bir bimysal güljek günüm.

Görmedigmi görjek günüm,
Bilmedigmi biljek günüm,

Üýşüp-üýşüp oturarlar,
Ýene gundap ýatyrarlar.

Men mundanam kowularyn
Hem başgaça dogularyn.

Sowlan günüm, kowlan günüm,
Doglan günüm, doglan günüm!