Bu gürrüñimde öñe sürjek,delillendirjek ähli pikirlerim özüme degişlidir we pikir alyşma,çekeleşmä açykdyr.Şonuñ üçinem ýazan ähli sözlemlerimiñ öñünde "meniñ pikirimçe"diýen söz düzümi bar saýyp okamaly.
Ilki bilen mowzugyñ adyndaky sowala jogap bereýin.
Goşgy kim üçin ýazylýar?
Bu sowala üç sany alternatiw jogap berse bolar.

a)ýazaryñ özi üçin
b)galamdaşlary we intellektual okyjylar üçin
ç)halk köpçüligi üçin

Jogaplaryñ hersiniñ üstünde aýratynlykda durup geçmekçi.
1.Goşgunyñ iki sany täsiri bar bolup,olaryñ biri okaýana edýän täsiri,beýlekisi bolsa ýazýana edýän täsiridir.Azda-kände bir zatlar ýazan (siz ony islege görä "çyrşan we "samyrdan"diýibem alyp bilersiñiz) awtor hökmünde goşgunyñ döredijidäki položitel täsiriniñ bahasyzdygyny aýdyp bilerin.Nämedir bir zada begenip,iki bolup bilmedik,ýa gam-gussa kölüne batan,gaharlanyp gaşlaryñ çytylan,elgaraz,duýgy taýdan iñ ýokary derejä ýeten wagtyñ goşgy seniñ dadyña ýetişýär.Ýüregiñi ak kagyza egisesiñ,ýazasyñ gelýär.Ýazmalysyñ.Ýazarsyñam.Çünki bu islegiñ öñünde hiç zat böwet bolup bilmez.
Şu ýerde şeýle sorag ýüze çykýar.
Ýazmasyna ýazdym welin,muny köpçülige ýetirmelimi?
Häzirki döwürde ýazanyñy köpçülige ýetirmek üçin öñki ýaly gazete hödürläp,poeziýa bölümine redaktirledip redaktoryñ tassyklamagyna garaşyp oturmak gerek däl.Global torlaryñ üsti bilen eseriñi gyzgyny bilen köpçülige ýetirmek mümkin.Şeýle bolansoñ internet älemi manyly-manysyz,çuñ-ýöntem diýmän birgiden edebiýat eserlerinden doly.
Özüm-ä duýgularyñy egismek maksady bilen "özüm üçin ýazdym"diýlen goşguny paýlaşmazdan öñürti mazaly oýlanmagyñ tarapdary.Ilki bilenem goşguny haýsy duýgy joşgunynda ýazan bolsañ,şol joşgun gideninden soñ okyjynyñ gözi bilen okap görmeli.Eger çuñ duýgy (pikir),ritm,delje tapyndy ýok bolsa goşguny köpçülige hödürlemeli däl.Oñarsañ hiç kim bilen paýlaşman,şahsy arhiwiñde saklamaly.Özüñe erk edibilmän paýlaşaryn öýdüp gorkýan bolsañ derrew ýoguna ýanmaly.Sebäbi gowşak ýazylan goşgy awtoryñ okyjynyñ gözündäki edebi keşbine zeper ýetirer.
2.Galamdaşlar we intellektual okyjyny bilelikde almagymyñ sebäbi ikisi bir şahsda jemlenen bolup biler.Meniñ intellektual okyjy hasap edenlerimiñ ählisem öz galamdaşlarym.
Olaryñ göwnünden turaýmagam ýeñil iş däl.Çünki,olaryñ özi hem söz yşkynda awara bolup ýörenler.Üns bilen seretseñ,senem olaryñ nazarynda şeýlesiñ.Asyl-a häzirki döwürde okaýanlaryñ aglabasy ýazýanlar.
Intellektuallaryñam barsynyñ sowatlylyk derejesi deñ däl.Şeýle bolansoñ,ýazan goşguñda deñagramlylygy saklamak möhümdir.Okyjy hökmünde az intellektual topara degişlidigimi aýdyp bilerin.
Meselem:Orazmyrat Myradowyñ Möwlana bagyşlap ýazan goşgy setirinde
"Fihi ma Fihi-de" jemlenen bary" diýen setire düşünmedim.Bu goşga düşünerden sowatlylygym ejiz geldi.Çünki,Möwlananyñ şeýle atly eseriniñ barlygyny bilemokdym.Şunuñ ýaly mysallar,käbir şahyrlaryñ döredijiliginde kän ýüze çykýar.
Käbir şahyrlar we olaryñ töweregindäkiler bolsa,şeýle goşgulary özlerine delil tutunyp,ýönekeýje goşgularyna okyjy ýaramaz baha berse hem "Siz poeziýa düşüneñizok"diýip olaryñ özüni ýekirmek bilen bolýarlar.Olar näme üçindir özleriniñ goşgularyna düşünmek üçin hiç hili sowatlylygyñ derkar däldigine düşünmeýärler.
3.Halk üçin ýazmak.
Halkyñ nazarynda beýiklige ýeten şahyrlar kimlerdir?
Magtymguly,K.Gurbannepes,G.Ezizow...
Munda ep-esli ýazarlaryñ adyny agzasa bolar ýöne şu üçüsini halkyñ nazarynda aýratyn beýiklige ýeten hasaplaýaryn.
Magtymgulydan başlalyñ.Magtymgulynyñ döwründe ýaşan adamlar onuñ döredijiligine düşündimikä we häzir ýeterlik derejede düşünýärlermikä?
Magtymgulyly meselede şundan añryk geçmek islemeýärin we jogaby siz agzalara goýýaryn.
K.Gurbannepesow.Şu wagta çenli türkmen edebiýatynda halk tarapyndan iñ ykrar edilen şahsyýet.Kerim aganyñ şygyrlaryndaky halkylyga türkmen edebiýatyndaky başga şahyrda eger-eger duşaýmarsyñ.Göräýmäge,ýöntemje setirler ýalydyr ,emma astynda çuñ many ýatandyr.Sebäbi Kerim aga çuñ pikri ýöntem beýan etmegiñ ussadydy.Häzirkileriñ käbirinde bolsa tersine,ýöntem pikri agyr beýan etmek bar.
Kerim Gurbannepesowyñ şygyrlarynyñ aglabasy hem halkyñ gündelik durmuşyndan susulyp alynandy.Gepleşik dilini ussatlarça ulanmagy başarýardy.
Gurbannazar Ezizow.Gurbannazaryñ ähli şygyrlaryna halk düşündimikä?
Atajan Taganyñ "Kyrk ýylda ýazylan kitap"eserinde Gurbannazaryñ şeýle meşhurlyga ýetmeginiñ sebäpleriniñ biriniñ onuñ tragiki ölümidigi hakynda bellenilýärdi.
Gurbannazaryñ döredijiligi öz döwründe-de,häzirki döwrümizde-de şeýle oñat mahabatlandyrylmasady,ol halkyñ nazarynda şeýle derejä ýetermidi?Muny nygtamagymyñ sebäbi Gurbannazary pes görkezmek däl,diñe onuñ şygyrlarynyñ "halkylyk"galybyndan daşýandygyny nygtamak.
Halkyñ içinden köp adam bilen söhbetdeş bolýañ welin,olaryñ Gurbannazara ýeterlik düşünmeýändigi,diñe il tersine bolmajak bolup oña "beýik"diýip goýberýändikleri aý aýdyñ ýüze çykýar.
Häzirki döwürde halk tarapyndan şeýle halanýan awtor hökmünde Kerim Hallyny görkezýärin.Goşgularynyñ köpüsinde hiç hili üýtgeşik tapyndy,çuñ pikir (duýgy) ýoklugyna garamazdan,halk ony söýýär.Munuñ düşündirişi näme?
Kerim özüniñ ýuwanja,ýapa degmeýänje setirlerini añryýany bilen mahabatlandyrmagy başarýar.Instagram,You tube ýaly köpüñ üýşýän wirtual ýerleri bolsa onuñ esasy hemaýatkäri.Onda näme üçin şol ýerlerde goşgy paýlaşýan beýleki şahyrlar onça meşhur bolaýanoklar?
Kerim halkyñ gowşak damaryny gaty gowy bilýär.Garyplyk,puly söýýän dostlar,biwepa gyz Kerimiñ şygyrlaryndan eriş-argaç bolup geçýär.Hakykymyşyn,dälmişin,manysyzmyş,ýöntemmiş bu zatlar onuñ gözünde köpüge degenok.Esasy zat halka ýaraýarmy,ýaraýar.Bulam bir başarnyk.
Üns berseñiz,Kerim Hallyny okaýanlarda poeziýa babatda az intellektuallygyñ hem ýokdugyna göz ýetirersiñiz.
Ine,şu tema boýunça şu günki aýtjaklarym şulardan ybarat.Galanynam näme,öz seriñde sowal et,jogap tap.

@Belki