Ýanyp duran hyjuwy dek jahylyň,
Hakykat ejizdir özün bukardan.
Kesdirip gylyja öz duran gynyn,
Büdretdiň göwnümi,
Bolup ýykarman.

Ýalbarsamam huzuryndan gaýtmadyň,
Ertirleri tüm görünýän şol günüň.
Sen meň syrym dostuma-da aýtmadyk,
Men seň ile berýän soňsuz gürrüňiň.

Ýoluňa ýagtylyk düşeýän Güneş,
Kölegäň mazamlar del nazarlara.
Bolmanda, käteler özüňe geňeş,
Ugruň Gündogarmy,
Günbatarlara?!

Mylaýym ýylgyryş, hoşamaý dide,
Owal-ahyr arzymany her kimiň.
...Aýt,
Kimsäniň syny gider sergide,
Tegmil degen peýzažyna bagtymyň.

...Ýanýodaň bezegi elwan nagyşly
Gülleri-de basga alyp gitdiň sen.
Mertdiň welin,
Şol gezeg-ä, bagyşla,
Namardyňam etmejegin etdiň sen.

***
Ýakdyň,
Ot aldy özgäniň
Ataşa rakyp melaly.
Düwnügen bagy çözmäniň
Şumy indi mekir aly?!

Kän göwnüňe deger öýdüp,
Dyman ýerlerim büs-bütin.
Ýörmesem-de hergiz aýdyp,
Menem bir adam ahbetin!

Hanasyndan çykan sözler
Höre-köşä seretmeýär.
Mydam göge bakýan gözler
Ýüregiňde ýer etmeýär.

Bildim,
Yşkymyň bar kemi,
Aşa hormat goýmam saňa.
...Bu dünýä söýdürip seni,
Özün ýigrendirdi maňa.


Gurbansähet Gurbansähedow