Gurbanlyk günüdi.
Ikimiz bileje hiňňildik uçduk,
Al-asmany ýelpäp gaýtdy başymyz.
Ýerde agtarypdym.
Gökde gowuşdyk,
Ertekä aýlandy degre-daşymyz.

“Uçmah” sözi “uçmak” sözünden, meger...
“Hemrasyna hamrak durnaň bolaýyn!
Uly il ýylda bir gurbanlyk berer,
Saňa gaýta-gaýta gurban bolaýyn!” –
diýdim.
Br ýylgyrdyň. Giňedi asman.
Ataşdan yş beren uçgun gördüm men...
Soň düşüp gidipsiň.
Galyp men ahmal,
Bat alyp, bat alyp uçdum ýördüm men.

Şol gün göwne soňsuz heser inipdir,
Syryna düşünip-düşüp bilemok.
On sekiz ýyl öňki şol hiňňildikden
Men heniz bolubam düşüp bilemok...


Kakamyrat REJEBOW.