Ýaňy dälmi, ýigrimi bäşiň ýelgini,
Batlaryma erk edýärdi dogumly.
Indi durmuş maglumata ýazýarlar,
Bütin maşgalaly, gyzly, ogully.

Düýn ýalydy, soňky jaňyň sesine,
Üýşüp döwre gurap meýlis guranym.
Kasam kabul edip, esger eşikli,
Ädimlermi nyzam bilen uranym.

Düýn ýalydy talyplygyň terligi,
Gop berende juwanlygyň yşkyna.
Sag aýakdan ätläp, nika suw dadyp,
Howlugyp barýanym Bagt köşgüne.

Düýn ýalydy, hozdur maňyz dadanym,
Toýuň ýatlamasyn gursakda jemläp.
Gijeler ikiçäk söýgümiz hakda,
Aýdyşanmyz bir-birege güjeňläp.

Ine, bu gün täzelendi öňkülik,
Gözüm düşdi ogul-gyza, perzende.
Ýeňles duýgularym ýegşerip barýar,
Durmuş ömrüň ýükün urýar gerdenme.

Ýyllar garradykça, agras bolýar-a,
Agramlygam artyar her bir pursadyň.
Ah, meniň ýaşlygym, nirä barýarsyň?
"Git" diýýänçäm, meň ýanymda dursadyň.

Aman Rozyýew.