Sen ahyry meni dünýä inderen,
Öz şirin janyňdan berip maňa jan,
Näçe gündir baş ujumda oturan,
Zat dadamok diňe gaýtarýaryn gan,
Üstümde ganatyn gerip dur ajal,
Eje, meni şu gezegem alyp gal!

Kän ýalbardyň, özelendiň, agladyň,
Diňlemedim, pişäm boldy geroin,
Beýle zatlar bolar öýdüp aňmadym,
Ölmän galsam, goýjagyma söz berýän,
Jesedim terk edip barýar şirin jan,
Eje, meni şu gezegem alyp gal!

Eje jan, sen Alla ýalbar, çäre gör,
Hiç bolmasa sadaka aýt başymdan,
Karz-kowal et, hekimlere sen ýalbar,
Olar meniň aýrylmasyn daşymdan,
Ajaly ýanymdan kowsunlar derhal,
Eje, meni şu gezegem alyp gal!

Daglar, daşlar çekebilmez ahymy,
Öläýsem aglarsyň urup dyzyňy,
Söz alybam ýetişmedim ahyry,
Men özümiň gowy görýän gyzyma,
Ol şeýle owadan, ýaňagynda hal,
Eje, meni şu gezegem alyp gal!

Ýelden gorap, Günden ýelpäp sen, Eje,
Ösdüripdiň guwanyplar boýuma,
Aýtmasaňam bilýärdim men keseden,
Taýýarlyk görýärdiň-ä, bilýän, toýuma,
Ýasyma siňmesin toplanylan mal,
Eje, meni şu gezegem alyp gal!

Men diňe synladym on dokuz güýzi,
Wah, ýene görsedim şonçarak ýazy.
Şol pursat üýtgedi oglanyň tüýsi,
Soňundan eşdildi hyrkyldy sesi,
Megerem, Ezraýyl ýetişdi derhal,
Eje, meni şu gezegem alyp gal!

Puja çykdy ähli arzuw umytlar,
Bu dünýäniň baharlary sowuldy
Umyt bilen toýa bakylan mallar
Söwer ogluň ýas toýuna sowuldy.
Enäniň gulagna henizem her hal
Ýaňlanyp dur:
"Eje, meni alyp gal!"