Sen ahyry meni dünýä inderen,
Öz şirin janyňdan berip maňa jan,
Näçe gündür baş ujumda oturan,
Zat dadamok diňe gaýtarýaryn gan,
Üstümde ganatyn gerip dur ajal,
Eje, meni şu gezegem alyp gal!

Kän ýalbardyñ, özelendiñ, agladyñ,
Diñlemedim, pişäm boldy geroin,
Beýle zatlar bolar öýdüp añmadym,
Ölmän galsam, goýjagyma söz berýän
Jesedim terk edip barýar şirin jan,
Eje, meni şu gezegem alyp gal!

Eje jan, sen Alla ýalbar, çäre gör,
Hiç bolmasa sadaka aýt başymdan,
Karz-kowal et, hekimlere sen ýalbar,
Olar meniñ aýrylmasyn daşymdan,
Ajaly ýanymdan kowsunlar derhal,
Eje, meni şu gezegem alyp gal!

Daglar, daşlar çekebilmez ahymy,
Öläýsem aglarsyñ urup dyzyñy,
Söz alybam ýetişmedim ahyry,
Men özümiñ gowy görýän gyzyma,
Ol şeýle owadan, ýañagynda hal,
Eje, meni şu gezegem alyp gal!

Ýelden gorap, Günden ýelpäp sen, Eje,
Ösdüripdiñ guwanyplar boýuma,
Aytmasañam bilýärdim men keseden,
Taýýarlyk görýärdiň-ä, bilýän, toýuma,
Ýasyma siñmesin toplanylan mal,
Eje, meni şu gezegem alyp gal!

Men diñe synladym on dokuz güýzi,
Wah, ýene görsedim şonçarak ýazy.
Şol pursat üýtgedi oglanyñ tüýsi,
Soňundan eşdildi hyrkyldy sesi,
Megerem, Ezraýyl ýetişdi derhal,
Eje, meni şu gezegem alyp gal!

Puja çykdy ähli arzuw-umytlar,
Bu dünýäniñ baharlary sowuldy,
Umyt bilen toýa bakylan mallar
Söwer ogluñ ýas toýuna sowuldy.
Enäniñ gulagna henizem her hal,
Ýañlanlyp dur:
"Eje, meni alyp gal!"