Gowulaň ep-esli azalýan döwri,
Sen ýaly gyzlaryň bardygna şükür.
Azgynlyk ahlakdan ar alýan döwri,
Sen ýaly gyzlaryň bardygna şükür.

Göwnüň giň, ullakan welaýat ýaly,
Görküň ýagty ýola hemaýat ýaly,
Bir gez aldamagam jenaýat ýaly,
Sen ýaly gyzlaryň bardygna şükür.

Bu gün söýüp, ertä ýeke çykmaýan,
Bagtyn diňe bir ýigitde çaklaýan,
Görkün bezese-de, erkin saklaýan,
Sen ýaly gyzlaryň bardygna şükür.

Öz ýarynyň kem-käsini ýaşyrýan,
Başyny dik, pälin pese düşürýän,
Baýlygyň bagt däldigine düşünýän,
Sen ýaly gyzlaryň bardygna şükür.

Nurly gözi bilen mährini çaýyp,
Sähel zada özün bagtly saýyp,
Entegem türkmeniň törüne laýyk,
Sen ýaly gyzlaryň bardygna şükür.

Kerim Hallyýew