Kaktus ýaly kök taşladym,
Ýandak ýaly gülledim men...
Barybir sen tiken diýdiň,
Güllerimi görmediň sen...
Görmediň sen geljegimi
Görmediň sen geljegiňi
Çigit ýaly umyt berseň,
Kynçylyklar yeňjegimi
Görmediň sen söýjegiňi
Söýmän gussa gömjegiňi
Irden jan alýan bedeniň,
Agşamlarna öljegini...
Bilmediň sen! (bolan boldy)
...Yşk depderi garalandy
Dünýäm şeýdip hapalandy
Arzuwlarym çapalandy
Entek ýaňy uçuş etdi,
Ganatyndan ýaralandy
Ahmyr çekdi - gözün ýaşlap,
Bir aýylganç seda boldy...
Ölmänkäler ýetiş dada,
Birje gelip gidäý boldy.
Dalda gözläp ýakyn-ýatdan,
Bilseň, umyt geda boldy
Çydam etmän pida boldy
Emma muny bilmediň sen...
Ýasyna-da gelmediň sen...
...Şeýdip şolaň ýasyn sowup,
Ýatlamany gyrçap, orup
Hiç kime aýtman toý etdim,
Ses ýetenden zowlandyryp,
Keçpelegi ýaňlandyryp,
Ak öýländen ertir daňa
Bulanyplar tans oýnadym,
Şadyhorram böküp çaňa
Pozup ykbalyň kartasyn,
Örtüp üste gam kürtesin
(Örtese hijran örtesin)
Gussa gelin boldy maňa
Indäm alan gelnim bilen,
Her gün toýy belledim men...
...Kaktus ýaly kök taşladym,
Ýandak ýaly gülledim men...
Arman, muny görmediň sen...


Ylham GURBANALYÝEW