Gelen geçer!
Dünýä nähili ýöntem!
Gelen geçer ömrün goýup hummara.
Bu gün orny törden,
ertesi görden
Birigün lukma bor ýowuz hundara.
Emma pana gelenler baky gelen ýalydyr,
Ölüm ýalan ýalydyr!
Her kes dünýäň eýesi!
Her kim ýygyp düýrendir tapan-tupan malyny,
Gaznasyna basandyr binýat tutup ebedi.

Munda her kim ýaşajak!
Her kes munda ýaşajak!
Gedaýa bak,
baýa bak,
gallaja bak,
aja bak,
Toýy synlap, ýasa bak,
ýakyna bak,
ýada bak,
Üsgürse öljek ülhide
Hem kemakyl ýaşa bak,
Her kes munda ýaşajak!
Urulsa-da,
sögülse-de,
söýülse-de,
gyrylsa-da,
Atylsa-da,
Çapylsa-da akyllysy-akmagy,
Ýaşatmajak bolundykça her kes beter ýaşajak,
Ýaşamak — matlapsyzlaň iň arzyly maksady!
Ýarajak ýa ýaranjak,
ýadyň ýamzyn ýalajak,
Munda her kim ýaşajak!
Gul bolmaga taýyndyr,
Kül bolmaga taýyndyr,
Köwläber bäbenegin.
Sebäbi bilýän ýokdur nämedigin ýaşaýşyň,
Sebäbi bilýän ýokdur ölümiň nämedigin!

Nobatguly Rejebow