Sowaşypdyr gyzgyn mähir ýüzlerden,
Herne çyn ýürekden gülýän azaldy,
Hemaýat agtaryp özge ýerlerden,
Ýagşynyñ gadyryn bilýän azaldy.

Parhy näme algynnymy ýa petir,
Saçagyñda dursa bereket get:ir,
Şahyr-a kän, emma welin dört setir,
Manysyn añşyryp düzýän azaldy.

Käbir ynsanlara agyrýar nebsim,
Ynsan Alladan soñ enä baş egsin,
Herýana çarpynyp atygsan nebsin,
Ynsap eleginde süzýän azaldy.

Dilleri on sere, burny ker sere,
Bilseñ ekin bitmez, ekseñ şor ýere,
Toba etmän, arzyñ ýeter kimlere,
,,Şuña şükür" diýip gezýän azaldy.

Ýaýna şahyr, geçer gider üç mysgal,
Bilýäñ ahyr, ömür gysga, gün gysga,
Şunça ýazanlaryñ bolmady ryswa,
Şükür aýagyñdan ilýän azaldy...

Awtory: Baýram Bejidow

"Eje" diýip aglardym

Gidenimde senden juda uzaga,
"Kemim ýok" diýip seni biraz aldardym.
Seniñ beren ýyly mähriñi küýsäp,
Ýeke wagtym "Eje" diýip aglardym.

Gujagyñdan melhem geler her demde
Gözüme bakañda duýgum añlardyñ.
Seniñ bilen ruhym göge ýetende,
Ýere düşsem "Eje" diýip aglardym.

Şatlansam begenjim, gaýgymda gussam,
Aýtmak üçin derrew saña ylgardym.
"Oglum" diýen sözleriñi eşdemde,
Begenjimden "Eje" diýip aglardym.

Durmuş kynçylygyn ýüzüme ursa,
Şeýle bir ejizläp dözmän ýadardym.
Emma, Käbäm melek deý gülüp dursa,
"Geç günämi Eje" diýip aglardym.

Uly işiñ bir ujyna geçemde,
Pata berip ogşap meni ýollardyñ.
Şeýle bir duýgy bar bilseñ içimde,
Göz ýaş bilen "Eje" diýip aglardym.

Ýeke galan çagym ýaşarar gözüm,
Ýürekdäki gussam goşga baglardym.
Ýykylsam üstümi kakardym özüm,
Şonda-da men "Eje" diýip aglardym.

Jemşit Hajymämmedow