Tutjak toýum toýlanman ýör , "Yrym-yrym , ýom-ýom" diýip
Seret oglum öýlenmän ýör , "Yrym-yrym , ýom-ýom" diýip
Sähetli gün bellenmän ýör , "Yrym-yrym , ýom-ýom" diýip
Gör gyzymam saýlanman ýör , "Yrym-yrym , ýom-ýom" diýip

 "Yrym-yrym , ýom-ýom" diýip , tapýarlar bolgusyz zady
Tapanlaram hijem welin saklaýarlar indi bady
Açaýsaň aladaň artýar açylmaýar kitap baby
Kitap okamakdan gorkýan , "Yrym-yrym , ýom-ýom" diýip

Her ýylda şaban aýynda köçelerde ot ýakýarlar
Günäleriň dökülýärmiş onuň üstünden bökýärler 
Ýa sogap gazanjak bolup , hiňňellige çykýarlar
Sogap gazanmakdan gorkýan , "Yrym-yrym , ýom-ýom" diýip

Ýaşamaly durmuş , heleý , yrym bilen göreşip
Dyrnaklaram palta boldy anna güne garaşyp
Derrew ýoldan yzyňa dön geçipdir gara pişik
Ýöremäne gorkýan indi, "Yrym-yrym , ýom-ýom" diýip

Sanasaň sanabermeli sanamadym baryn belläp
Meniňkä maslahat bermek galanynam özüň bildä
Şu zatlara ynanýançaň ondana sygyn sen Alla
Gerçegä halys ýadady, "Yrym-yrym , ýom-ýom" diýip

(21.08.2022)

Gerçeknazar Amannazarow