MASLAHAT

Bir bol,  "iki" bolsaň halamaýarlar,
Birlik ölçegi bar herki zadyňam.
Azdyr goşmalygy makullap barýan,
Sada at bolaýsa kem däl adyňam.

Ýyl deýin dört hili öwüsip ýörmän,
Reňkiňem, eňkiňem bir bolsa ýagşy.
Geldiňmi görüp git gören şekilli,
Ikilenç gaýtalap bolmaz ýaşaýşy.

Asman ýaly elýetmezlik möhüm däl,
Gözýetmez syrlaryň bolsa bolany.
Ömrüň Güneş bolsun ýa Aý, parhy ýok,
Bir özi nur bolup bilse bolany.

Ikiligiň jemalyna aşyklaň,
Neslinden bolmasyn köňlüňdäki yşk.
Başarsaň bir sözli bolmaga çalyş,
Wadalarňam durmawersin "dyknyşyp".

Bir bolsun ugruňam, ýogsa kyn bolar,
Durmuşda ýerleşýän ýeriňi tapmak.
Keşbiň birligine galsyn, ýeňil bor,
Dünýäň aýnasyna bakan halatyň,
Öz-özüňi tanamak.

ISA HOJAMERDANOW