Nar ekipdik seniň bilen
Ýakasyna suwly salmaň.
Ol meň hakydama siňen,
Bilmen ony ýada salman.

Gam çekýändir o nar şindem
Düýn ulalmaga howlugan.
Haraý-dalda isläp senden,
Garaşýandyr bir gowluga.

Ýöräp görmekdir hyýaly,
Başynda bolsady kändir.
Ýöne olam meniň ýaly
Bu dünýä düşünýän däldir.

Derdini hiç kim bilmese,
Ahmyr ony ýakar bu gün.
Ol bozulýandyr diňlese,
Aýdymyny akar suwuň.

Guşlar bolsa şahasynda
Aýralyga aglaýandyr.
Dogan!
Salmaň ýakasynda
Heý bir zatlar aňlaýarmyň?

Kakamyrat Ataýew