Mahmal gabak, mahmal ýaňak, mahmal dodak güller-eý,
Sizi ýollan ýaryň mahmal gözlerinden gorkaram.
Bägüller deý aýdymlar hem süllerer, ah, süllerer,
Salam ýollan ýaryň mahmal sözlerinden gorkaram.

Göwre Ýeri mekan tutdy, göwnüň mekany Arşdyr.
Elajym ýok, emrimdäki, bir kenizim ýylgyryşdyr,
Jan --- amanat, şan --- amanat, bir ýalkawy ýalbaryşdyr,
Sünbül saçlarym sarçdyr, çözlerinden gorkaram.

Gursagynda buýsanç bilip, ýaban halynda megerem,
Ilkidurmuş howsalasyn saklaýandyr özgelerem,
Bir sekuntlyk ýyldyrymdan düýrügerem, düýrügerem,
Yşk oduna döz gelerem, közlerinden gorkaram.

Ýar garaýşy gyýçak-gyýçak, bagryň gyýjak, sünjüler,
Ýar gözleri bup-bulançak, ody öçük, küljümek,
Şu ünjüler burçak-burçak, boýnuň burjak ünjüler,
Kirpiklemden dür-hünjüler düzlerinden gorkaram.

Hijranyň hüjresi kapas, hüjrede hijrana ýer ýok,
Söýgüniň hüjresi sähra, uçýarlar ganat ýok, per ýok,
Ýerden behişdi ys galyp, bägüller şoh, bägüller çoh,
Siz deý bir zaman ysgalyp, dözlerimden gorkaram.

Daglar, Daşlar, Gar-Ýagyşlar ,Aý-Gün, Ýyldyzlar ýar maňa.
Seýkin basyp, seýran etmek, güller ysgamak ýat maňa.
Al-asmanda gaýyp ýören Laçyna men, Laçyna.
Eý, Bägüller, men bägülleň özlerinden gorkaram.

Laçyn Pürjäýewa
07.02.2008ý.