YNAM
Oglan-gyza parh goýmazdyk o günler.
Barymyz oýnardyk bile, gatyşyp.
Bir ýerde hakyky uruş gidýärdi,
Biz oýnardyk obamyzda atyşyp.

Ýary bizlik, ýary “duşman” bolsa-da,
Çagalar birmeňzeş geýnilgidiler.
Biz ýeňerdik, ýöne “duşman” toparam
Bizden ýeňilmäge meýillidiler.

Uruş tamam boldy, ýeňdik biz çyndan,
Gelenleri garşy aldy diýary.
Meň göwnüme bu uruşda olary
Biziň ynamymyz ýeňdiren ýaly.

A. Annaberdiýew