Özi üçin däl, meniň üçin,
Hakdan dilegi köp eden.
Howsalasy bilen maňa,
Gelýän dertleri dep eden,
Hemişe hem hemme ýerde
Keşbime suwsan enemdiň.

Ýüregi dert, gözleri dört,
Ýollaryma bakyp galan.
Gaýgydan, gamdan, görgüden
Daňa golaý ýatyp galan,
Janserek-perwaz enemdiň.

Göteren, guwanan, eklän,
Yrym edip, çirim etmän.
Sabyrly, sada hem pespäl,
Sen meniň ryzwan enemdiň.

Bilbil mysaly nurana,
Gögerçin deý görmegeýim.
Owlagyň — ogluň ugrunda
Keýik kimin keýerjeklän,
Maral dek ylgan enemdiň.

Galsam dünýäniň tümünde,
Al şapak kibi lowurdan.
Albaýym — elwan belendim.
Men watansöýüji Ýusup jan,
Sen meniň Kengan enemdiň.

Pikirlerne gümra bolan
Syrlary pynhan enemdiň.
Ýeke-täk öz sesi bilen
Gürleýän Ynsan enemdiň.

Gurbandurdy Orazow
Çeşmesi: https://www.br.com.tm/sections/5/4929. 11.04.2023ý.