Hoşlaşyk
Men owadan gürlemegi bilemok,
Bu zatlar seň üçin täzeligem däl,
Indi seni öňkim ýaly söýemok,
Şu pursatdan bizi aýyrýar ykbal.

Gygyrmagyň peýdasy ýok saňa-da,
Bilýän, sen ykbala ynanaňokdyň,
Ynamsyzlyk bilen soýgi arada
Bir meniň daragtym yrananokdy...

Indi ol günleriň mazasy gaçdy,
Dostlar bolup galsak bolardy gowy.
Barybir birigen kalplar çat açdy,
Ynamyňam soňy, söýgiňem soňy.

Köp ýatladym ýokardaky sözleri
Gussady ol henizlerem diňmedik,
Gözleriň entägem söýgi gözleri,
Sebäp dostlar bolup galyp bilmedik.

Arzuw
Bir gezek şeýlebir bagtly boldum,
Şol gün utanmadym daşymdan gepläp,
Maňa bakan nazarlardan sowuldym,
Ýa-da käbirini güldüm itekläp.

Şol gün söýgim bilen bile oturyp,
Gürrüň berdim oňa hekaýam hakda.
Uzak bolan gijeleri getirip,
Ýakyn gijeleri goýduk uzakda.

Soňam ýagyş ýagdy, menem üşedim,
Ýapraklar deregin tutmady eliň,
Arzuwly kagyzym ýola düşedim,
Bulutlar agraldy, sallandy egin.

Gidenleriň gelmeýänin aýdýandyr,
Umytlaryň üstün barha basdy suw,
Belkem, sensiz ýaşamarys öýdýändir,
A biz ýaşap ýörüs-men hem-de arzuw.

Bägül ATAÝEWA