Ýag ýagyş ömrümiň bagtly bir güni,
Gaýgylarym akyp gitsin sil deýin.
Ýüregimde öýke-kine bar bolsa
Goý, arassalansyn köçeler deýin.

Ýag ýagyş ömrümiň bagtly bir güni,
Arzuwlar edeýin hiç soňlanmajak.
Ýagyşyň astynda durup bir sellem
Kömelek ýygaýyn men gujak, gujak.

Ýag ýagyş ömrümiň bagtly bir güni,
Ýary bir pursatlyk hyýala getir.
Ýüregimden dömüp çykan arzuwlar
Bizi tükenmejek şatlyga ýeti:r.

Ýag ýagyş ömrümiň bagtly bir güni,
Belki şol gün ähli zatlar undular.
Ýag ýagyş täzele köne kalplary
Köne kalplar bizi gaýga goýdular.

Ýag ýagyş ömrümiň täze bir güni
Seniň bilen bagtly ýola açylsyn.
Ýagmyryň astynda ezileýin men
Töwerege söýgi nury seçilsin.

Ýag ýagyş ömrümiň bagtly bir güni,
Kirlän göwünleri tämizlär ýaly.
Goý, ýagşyň yzyndan älemi bezäp
Älemgoşar çyksyn päklik nyşany.
26.08.2023ý
Ýalkapowa Oguljeren