"Habar alyp dur"

Çöken göwünleri galkynar ýaly,
Habar alyp durgun naçarlaryňdan.
Arzylap gymmatly bir tumar ýaly,
Habar alyp durgun naçarlaryňdan.

Seni bagtly etjek dünýe baryňdyr,
Abraýyň, mertebäň, namys-aryňdyr,
Eneňdir, uýaňdyr, söwer ýaryňdyr,
Habar alyp durgun naçarlaryňdan.

Ölümden galanna tapylar alaç,
Bigadyrlyk bardyr - ana şondan gaç,
Olar mydam bizden mähire mätäç,
Habar alyp durgun naçarlaryňdan.

Mydam gülüp bakgyn, çytmagyn gaşyň,
Alkyşlaryn alsaň şowlanar işiň,
Olardyr syrdaşyň, hem göwün hoşuň,
Habar alyp durgun naçarlaryňdan.

Bulançak pikirler durlanar ýaly,
Gasyn basan ýüzler terlener ýaly,
Sen hakda buýsançly gürlener ýaly,
Habar alyp durgun naçarlaryňdan.

ÝUSUP MEREDOW