Sen asmanda,
A, men bolsa zeminde,
Aramyzda atmosfera diwary,
Onuň aňyrsyndan sesiň eşidilýär,
Sen gülýärsiň:
"Men beýikde, sen pesde"
He-e-e-ý, nadan, işigaýdan!
Sered-ä Allanyň edýän işine,
Ol topragy pes edipdir,
Asmany beýik,
...üýtgeşik bir tebigaty gurupdyr,
Seret asman näçe beýik bolsa-da,
Barbir ýüzi ýere garap durandyr.
Toprak pes däl,
Toprak—pespäl!
Biz şol pespällikden döremedikmi?
Unudyp toprakdan döränligmizi,
Her gün oň üstünden ýöremedikmi?
Toprak şeýle pespäl bolmadyk bolsa,
Özünden döräni depä göterip,
Ýene öz üstünde ýöredermidi?
Ynsan beýikligiň guly däl bolsa,
Nebisi gözüni kör edermidi?
Şol gözlermiz bilen asmana bakyp,
Ömür boýy beýikligi söýýäris,
Soňam hiç zat bolmadyk deý,
Utanman,
Topragyň gujagyna girýäris.
***
Agaýunus däl men, däl aslym otdan,
Ummany joşduran suw perisem däl,
Aslym nurdan dörän melegem däl men,
Ýedi gatly asman öýümem däl meň.
Men ynsan perzendi,
Kemli bir gul men,
Belki, il gözünde tikenli gül men,
Belki, deňi däldirin ýerdäkileriň,
Emma perisem däldirin ertekileriň,
Keşdämdäki hünjimem jadyly däldir,
Her gülemde bägüllerem açylmaz,
Ýedi sany erkek dogan gala:m däl,
Ýekeje syrdaşym birje galamdyr,
Ynsanlyga laýyk edýän her işi,
Men topraga mahsus,
Toprak perisi,
Men zemine mahsus,
Aşyk dünýäme,
Bärde kanunlar bar, boýun egmeli,
Bärde dessurlar bar, uýmaly kemsiz,
Bärde dertlerimiz bar heniz çekmeli,
Emma şükür Alla, goýmady emsiz.
Ýersiz däldir bu dünýäniň kadasy,
Adalaty egrelse-de döwülmez,
Ýigrenilýän bolsaň bardyr sebäbi,
Öwülýänler ýersiz-ýere öwülmez,
Arasynda bardyr töhmetsöýerem,
Bardyr zähmetsöýerem,
Ýamanlyga hormat goýýanlaram bar,
Ýagşylygy has beter söýýänlerem bar,
Sözlerden göwnüňde tagt gurýanlar bar,
Sözler bilen şol tagty ýykýanlaram bar,
Şular bilen bardyr zeminiň özi,
Bular bu dünýäniň sag hem çep gözi.
Menem bar,
Zemine mahsus, topraga aşyk,
Topraga baglydyr meniň her demim,
Şonuň üçin elmydama ýerde men!

(Toprak—pespällige uýýan beýiklik,
Belki toprak şonsy bilen beýikdir!)

Aýsapar EMELOWA