NÄBELLI GAHRYMANA

Ukrain çölünde, ýapyň üstünde
Ak şelpeli derek ygşyldap otyr.
Gan öýülen gara toprak astynda
Türkmen esgeriniň mazary ýatyr.

Gök çüýşe dek dury asuda asman,
Derek-da baş egýär gubura sary.
Enaýy şelpeler owazyn kesmän,
Hüwdüleýär ýalňyz ýatan mazary.

Türkmen enesiniň jan-jigirbendi,
Ukraina üçin ganyn döküpdir.
Tebigatam sylap batyr perzendi,
Üstünde solmajak güller ekipdir.

Goňur gullakjanyň ýyldyzy indi
Mazaryň başynda saçyp dur ýalkym.
Armanly ölse-de gerçek perzendi,
Adyny aýdyma öwürdi halkym.

Aýdym bolsa ömürbaky ölmeýär,
Aýdym adamlaryň göwün syrdaşy.
Ol esgeriň adyn adam bilmeýär,
Emma ol adamlaň baky gardaşy.

Ukrain çölünde, ýapyň üstünde
Ak şelpeli derek ygşyldap otyr.
Gana ýuwlan gara toprak astynda
Türkmen esgeriniň mazary ýatyr.

Ata ATAJANOW