Gündiz dogmaýar Gün,
Aý bolsa, agşam,
Asman barda,
neçüýn onna ýyldyz ýok,
Ýyldyz baram welin, ýok onuň yşgy,
Ýyldyrym çakanda onuň ody ýok.
Gök gürledi, emma, ýagmady ýagyş,
Ýagyş ýagdy ýöne çykmady goşar,
Bu neneňsi boldy, nähili goşgy?!
Tebigata,
Ýa asmana,
Ýa ýere?
Bilmedim, men nämä etsemkäm bagyş?!

Deňiz bar-da,
Suw içinde balyk ýok,
Tiken bar-da,
Ýöne welin, ýok güli
Baglar baram welin, ýokdur miwesi,
Ýaplar jaýryk açdy, ýok onuň suwy?
Diňe meň göwnüme şeýle hemmesi,
Diňe meň gözüme şeýle hemmesi,
Emma size ýalan, maňa bolsa – çyn,
Ynanmasaň, gel-de, meň ornumda dur,
Ýok, ýok meň gözüm bilen seret gowsy.

Gülki bar-da,
Men nämüçin gülemok?!
Şatlyk baram bolsa, neçüýn bilemok?!
Öňler beýle däldim aslynda ilki,
Ne ýolukdy, ne döw çaldy halyma?
Dälimi,
Diwana – aýdarsyň belki!
Telwas urup gürsüldeýär bu ýürek,
Kalbymyň, aramy, didelem zary,
Kapasa-da, urunýan men janserek,
Çünki maňa söýgiň gerek,sen gerek!

Gurbanmämmet Meredow.