Harby geýim geýen janlar,
Meň oglumy gördüňizmi,
Tälim alyp ýören känler,
Meň oglumy gördüňizmi?!

Kirpikmen kamak gözlüdir,
Gysga däl, orta boýludyr.
Akylly Kerem sözlüdir.
Meň oglumy gördüňizmi?!

Gulluk agyr, ardym diýmez,
Esgerlikden irdim diýmez ,
Ýalta bikärligi söýmez,
Meň oglumy gördüňizmi?!

Gaýdan ýeri Maryň ili,
Dört pasyl solmaýar güli,
Aşyp geldim uzak ýoly,
Meň oglumy gördüňizmi?!

Bu ýerlere diýrler Tejen,
Topragyndan nurlar seçen,
Çagyryň, geldi diýip, ejeň,
Meň oglumy gördüňizmi?

Jumagözel Annaberdiýewa