Bu goşgymy ýazýan heniz dirikäň
Sanalgasy dolup barýan birikäň
Gözden gaýdýan damjalaryň şory kän
Soňky gezek jan diýeýin,Ejejan

Okap bermen janyň barka elbetde
Umyt edýän aýan bolar jennetde
Şeýle bolsa arman galmaz jinnekde
Soňky gezek jan diýeýin Ejejan

Gezip ýördüň öýlerimize aýlanyp
Mydam çagalaryň hakda oýlanyp
Baky uka bataýjakmy şaýlanyp?!
Soňky gezek jan diýeýin Ejejan

Bu gün maňa köpler diýer dälirän
Bagryna aýralyk ody çabyran
Bu gün şygryň ýerimidir,mähriban?!
Soňky gezek jan diýeýin Ejejan

Äkiderler gabrystana göterip
Ejeli günlerimäm elden aparyp
Bilmerin hiç kime dadym ýetirip
Soňky gezek jan diýeýin Ejejan

Durmuşyň kadasyn üýtgeden ýokdur
Bu dünýä gelmek hak,ýogalmak hakdyr
Alyp galaýmaga alajym ýokdur
Soňky gezek jan diýeýin Ejejan

Akynazar Töräýew