KAKYP ÝÖR.

Ýene-de güýz sary gussa öwrülip,
Ýalňyz kalplaň gapysyny kakyp ýör.
Göwnüm bolsa bulutlarda sowrulyp,
Al-asmanda gözýaşlaryn döküp ýör.

Saklanyň-a, toýnuk guran, eý, guşlar,
Siz ömrümiň ýyllaryna meňzeş-le.
Gizlesem – ahmyr-ah,
aýtsam – zeýrenç deý,
Soňsuz sözler bu gursagy ýakyp ýör.

Ýazdyrdykmy ýüki ýetmän menzile,
Ýa bu yşky öwürdikmi endige?!
Gör, bu güýzler ak sabalaň meňzine
Söýgimiziň suratyny çekip ýör.

Durmuşdyr bu, eder ýörer islänin,
Seljermez ol ýüregiňde besläniň.
Çytylma-da, sözlesene, asmanym,
Neçüýn Aýyň Nur-kuýaşdan gaçyp ýör?

Ulumsy boldummy, gedem boldummy,
Durmuş bilen oýun eden boldummy?!
Ah, bu hyýal henizlerem ter gülli,
Şo-ol ýerlerde seň ýoluňa bakyp ýör.

Dönüp gözýetimde sary salgyma,
Garagöz ýar, sen aglama, aglama!
Dolanmazmyň,
her gelende ýazlaram
Seniň ajap toý köýnegňi tikip ýör...


Kakamyrat REJEBOW.