Arada agzalaň biri mowzuk açypdyr. Belki okansyňyz. Haýsy agza haýsy welaýatdan? diýip. Agzalaram ýaşaýan ýerlerini ýazypdyrlar. Wrode bulam bir güýmenje mowzuk, niýetim akyl bermek däl, kim nämäni halasa şony paýlaşar. Ýöne şo ýerdäki bir teswir ünsümi çekdi. "Ýene-de bir tat". "Menem Lebapdan" diýen teswire ýazylan jogapdy bu.
Käwagt köpçülikden şeýle sözleri eşidýän: "Aşgabatlylar wysşyý sort, bizem ikinji sort adamlar hasaplanýarys". Muňa edil beýle göz bilen seretmeli dälmikä diýýän. Sebäbi islendik döwletde-de paýtagtyň ýa-da ösen bir şäheriniň mümkinçilikleri, ýaşaýyş amatlyklary beýleki ýerleriniňkiden has ýokary. Dünýäniň tutýan meýdany boýunça iň uly döwleti Rossiýanyňam ähli ilatynyň ýarysy diýen ýaly (käbir maglumatlarda ýaryndanam gowragy) Moskwa bilen Piterde ýaşaýarlar. Iň bärkisi goňşularymyz Özbegistanda-da welaýatlardan Daşkende gelip propiska üçin janserek bolýanlar sanardan köp.
Bir dostum gül ýaly işini taşlap Aşgabatda 10 ýyldan bäri köçe süpüriji bolup işleýär (Köçe süpürýänlere hiç hili pes garaýşym ýok. Hemmelerem halal gazanýandyr welin, olaryň gazanýany halalyňam halaly). Aýdyşyna görä umumy ýaşaýyş jaýyndan ýaşamaga ýer beripdirler, garaz soňlugy bilen propiska durup bolýan eken.
-"Şol propiska şeýdip köseneniňe degýärmi dostum" diýip soradym bir gezek.
-"Men kösensemem, çagalarym gowy ýaşar" diýip jogap berdi.
Arzuwyňa ýetmegiňi dileýän dostum.
Indi ýaňky "tat"-ly gürrüňe dolanyp geleliň.
Kakalary, ejeleri azap edip, kynçylyk baryny görüp, ahyrynam arzuw, umytlary amala aşyp Aşgabatdan jaý alsa, "Aşgabatly" bolsa, onuňam hiç zat görmedik çagasy gelip öz obadaşyna "tat" diýse haýsy düşünjä dogry geler. Aşgabatda ýaşaýanlaryň 90 %-i haçanam bolsa welaýatlardan göçüp baranlar.
Aşgabat! Mähriban paýtagtym, arzuwlarymyň ganaty, Watanymyň ýüzi sen. Saňa aşyk bolsamam, sende hemişelik ýaşamagy arzuw etmändim. Sende ýaşaýanlara-da diňe gözüm gidýär. Ýöne Aşgabadym saňa bir zat aýdaýyn. Bäş welaýaty aýlanyp sende ýok zatlary gördüm. Howwa, sende ýok zatlary. Belki olaryň käbiri bütin dünýäde-de ýokdur. Balkan Gumdagymyň agaranly düýe çaly, içseň ikinji gezek dünýä inýäň. Ahal Bäherdenimiň domalany, bu bir Allaň beren peşgeşi. Marymyň gije-gündiz müşderilerine ýokary hilli hyzmat edýän "Aşgabat" gipermarkedi. Lebap Mukrymyň balyk tamdyrlamasy, ömür ýatdan çykmajak tagam. Daşoguzymyň Gubadag fitçisi, semremek isleýänleriň dermany.
-Dost, diňe iýip-içgi ýazaýypsyň, başga-da gaýtalanmajak gymmatlyklarymyz bar-a.
-Iş saparda esasanam garnyň doýan ýerleri gowy ýadyňda galýan eken.
Beýleki gymmatlyklary ýazmagy bolsa özüňize galdyrýan...