Uefa superkubogy bir oýundan ybarat bolup, çempionlar ligasy we ýewropa ligasynyň ýeňijileri baş baýrak üçin göreşýärler. Muňa geljek ýyllarda konferensiýalar ligasynyň ýeňijisinem goşmak göz öňünde tutulýar.
Bu ýaryş ilkinji gezek 1972-nji ýylda Gollandiýanyň "De Telegraf" gazetiniň habarçysy Anton Witkamp-yň tagallalary bilen geçirilýär. Şol wagtlary bu ýaryş iki oýundan ybaratdy. Öý we myhman oýunlary görnüşinde geçirilen ilkinji ýaryşda şol wagtlardaky Ýohan Kroýf we onuň ýeňilmez Aýaksy Glazgo Reýnjersi iki oýnuň netijesine görä 6:3 hasabynda ýeňmegi başarýar.
Elbetde UEFA şol wagtlary bu ýaryşy resmi ýaryş hökmünde kabul etmeýär.
Bu göçme kubok hasaplanýar. Eger haýsydyr bir klub bu ýaryşda yzly-yzlyna üç gezek ýeňiş gazansa, ýa-da umumylykda bäş gezek ýeňiş gazansa, onda kubok şol topara hemişelik berilýär. Häzirlikçe beýle bagt diňe iki topara nesip eden. Ilkinji gezek Milan kluby 2007-nji ýylda Sewilýany ýeňip, umumylykda bäşinji ýeňşini gazanýar we kubogy hemişelik saklamak üçin öz muzeýinde goýýar. 2015-nji ýylda bolsa Barselona ýene şol garamaňlaý Sewilýany ýeňip kubogy hemişelik özüniňki edýär. Bu kubogy dört gezek gazanan iki klubam bu bagta golaý. Liwerpul bilen Real Madrid, hasam Real Madrid. Eger olar bu gün ýeňiş gazanaýsa Superkubok hemişelik saklamak üçin Santýago Bernabeudaky muzeýe ýol alar.
Bu kubogy iň köp gazananlar: Milan bilen Barselona - 5 gezek. Real Madrid, Liwerpul - 4 gezek. Aýaks, Atletiko Madrid - 3 gezek. Çelsi, Bawariýa, Anderleht, Walensiýa, Ýuwentusda - 2 kubok. Kubogy 1 gezek gazanan klublar bolsa: Sewilýa, Portu, Mançester Ýunaýted, Dinamo Kiýew, Notingem Forest, Aston Willa, Aberdin, Stýaua, Mehelen, Parma, Latsio, Galatasaraý hem-de Zenit.
Bu ýaryşda iň köp ýeňilen topar Sewilýa - 5 gezek.
Umumylykda 1-nji orunda ispan klublary. Olar 15 gezek ýeňiş gazanyp, 14 gezegem ýeňildiler.
2-nji orunda iňlis klublary 9 ýeňiş, 10 ýeňliş.
3-nji orunda italýan klublary 9 ýeňiş, 4 ýeňliş.
Ýaryşyň taryhyndaky iň köp gol geçiren oýunçy Adrianus "Ari" Haan. Ol 1972-1978-nji ýyllar aralygynda jemi sekiz oýuna gatnaşyp 5 gol geçirmegi başardy.
Ýeňiş gazanan klub 5 million ýewro, utulan klub 3 million ýewro pul baýragyna eýe bolýar.
Hemmäňize owadan oýun görmegi arzuw edýärin.
Üstünlik Aýntraht.
Hala Madrid...