Señ dokuzuñ düzüw,
Ýurdyñ abat,
Bahana tapañok närzaçylyga.
Durmuşyň akymy,
Işleñde amat
Seni melul edip,
Barýar gowluga.

Sen
Kän zada barha ýakynlaşýarsyñ,
( Ýöne,
Ýeke zatdan daşlaşyp barýañ)
Gymmat bahalydyr alýan zatlaryñ,
Itiñ ýalagyna bal guýup berýäñ.

Çagalañ hemişe şokalad iýýär,
Durşuna al-ýaşyl zir-zibilhanañ.
...Goñşyñ bir azajyk karz soraýar?
Belent başy aşak,
Gursakda arman.

Sen
Birbada belli jogap bereñok,
Sen dymýarsyñ,
Belki, buda bir hasap.
Keýp edýärsiñ didiwana mündürip,
Mätäç kişä berip ruhy azap.

Mätäç kişi bolsa içinden aglap,
Sandyrap
Ýüregniñ urgysy bilen,
Bara-bara ýere siñişip barýar
Mertebäñ
Galyñlyk
Ülñüsi
Bilen.

Sen!
Henizem belli bir söz aýdañok,
Otyrsyñ
Agzyña suw alan ýaly.
Ahyr
Gedemligiñ añry çäginde,
Taşlaýañ öñüne bir gysym puly.

Goñşyñ turup gidýär agyr ýük alyp,
Gerdene däl-
Ýüregüne, göwnüne.
Şokalad däl,
Eýsem, bir döwüm çörek
Görünip dur çagalarnyñ gözüne.

Basgançak-
Basgançak
Merdiwan
Bilen,
Sen!
Päsgelsiz barha ýokary galýañ.
Adamy adama ýakynlaşdyrýan
Adamkärçilikden daşlaşyp barýañ.

1987ý.

Şyhymyrat Abdyllaýew.