Her özbaşdak döwlet dünýäde özüniň döwlet nyşanlary bilen tanalýar. Türkmenistanyň Döwlet baýdagy, Döwlet tugrasy 1992-nji ýylyň 19-njy fewralynda döredildi. Döwlet senasy bolsa 1996-njy ýylyň 27-nji sentýabrynda döredildi. 2007-nji ýylda onuň teksti täzelenip many-mazmun taýdan kämilleşdirildi.
Döwlet baýdagymyzyň we Döwlet tugramyzyň düşegi ýaşyl reňkde bolup, ol tebigatyň reňki. Ol Garaşsyz Türkmenistanyň ýaşyl ýaýlalaryny, bolçulygy, täzelenýän durmuşy aňladýar. Ýarymaý we bäş sany ýyldyz bolsa ata-babalarymyzyň gadymy ynançlaryna goýulan hormaty alamatlandyrýar. Aý - bakylygyň alamaty. Türkmenlerde täze çykan Aýy ýüzüne sylyp dileg etmek däbi bar. Bäş sany haly göli bolsa bäş sany welaýaty aňladýar. Bäş welaýatyň haly gölleriniň Döwlet baýdagymyzda ýerleşdirilmegi türkmen halkynyň bir saçagyň başyna jemlenip, agzybirlikde ýaşaýandygyny aňladýar. Zeýtun şahajyklary bolsa parahatçylygyň, bitaraplygyň alamaty.
Döwlet tugramyz sekizburçludyr. Onuň taryhy kökleri gadymyýetden gaýdýar. Ol şekil haly, küýzegärçilik, zergärçilik sungatlarynda hem gadym eýýamlardan bäri ulanylypdyr. Döwlet tugramyzdaky bugdaý - saçagymyzdaky çörek, ol mukaddes hasaplanýar. Ak pagta hanalary bolsa türkmeniň baýlyk çeşmeleriniň biri. Ak reňk arassalygyň, halallygyň alamaty. Tugramyzdaky ahalteke bedewi bolsa türkmeniň buýsanjy we wepaly dostudyr.
Türkmenistanyň Prezidentiniň Tugy 1996-njy ýylyň 19-njy iýulynda kabul edildi. 1994-nji ýylyň 19-njy fewralynda Türkmenistanda ilkinji baýdak baýramy bellenildi. Her ýylyň 19-njy fewralynda baýdak baýramy bellenilýär. Aşgabatda Döwlet baýdagymyzyň belent sütüni dikildi. Ol 133 metr bolup, iň uly Döwlet baýdagy hökmünde Ginnessiň rekordlar kitabyna girdi.