Meniň pikirlermi nähili görýäň,
Sen nähili görýäň goşgularymy?!
Asla meň dünýämi nähili görýäň,
Şähermi,
Köçämi,
Goňşularymy...

Meniň baglarymy nähili görýäň?!
Deňinden geçemde ýaňagma degýäň.
Meniň daglarymy nähili görýäň?!
Beýigem bolasalar başlaryn egýän...
Meniň penjirämi nähili görýäň?!
Köçä däl-de,
Dünýä tarap açylan...
Meniň gulçyramy nähili görýäň?!
Gülüp-gülüp ýagty bary saçylan...

Kitaplarmy, depderlermi, galamlam,
Gerekli-gereksiz goş-golamymy.
...Ah, ol zatlaň ählijesem owarram,
Sen nähili görýäň goşgularymy?!

«Erbet» diý,
«Gowy» diý,
«Her hili « diý, ýa...
Ýöne «Maňa hemmejesi deň « diyme!
Hernä... meňzeş bolsun dünýäme dünýäň,
«Seniň dünýäň meniň üçin geň» diýme...

Aýgül Garaýewa