Bir gezek bir adam hemişe bolşy ýaly, ýadaw halda işden giçlik öýüne dolanyp gelende, gapyda bäş ýaşly oglunyň özüne garaşýandygyny görüpdir.
– Kaka, senden bir zatlar sorap bilerinmi? – diýip, ogly özelenipdir.
– Elbetde, näme boldy? – diýip, kakasy geňirgenipdir.
– Kaka, ýogsa-da sen näçe aýlyk alýarsyň?
– Bu seniň işiň däl. Onsoňam ol saňa nämä gerek boldy? – diýip kakasy gaharly jogap beripdir.
– Diňe bilesim gelýär. Aýdaýyňda kaka, siz näçe gazanýarsyňyz?
– Hawa, umuman, gowy gazanýan. Hä, name boldy?
Ogly oňa çynlakaý seredip: – Kaka, sen maňa biraz pul berip bilmersiňmi? – diýipdir.
– Sen menden haýsydyr bir bolgusyz oýunjak üçin pul soraýaňmy? – diýip, kakasy gatyrganypdyr. – Haýal etmän, öz otagyňa git-de, ýat! Men uzakly gün işleýän, gaty ýadaw, sen bolsaň, batnyksyzlyk edýäň.
Oglanjyk lapykeç halda, öz otagyna geçipdir-de gapyny içinden ýapypdyr. Kakasy bolsa, oglunyň eden haýyşyna iňirdemesini goýmandyr. Ýöne biraz wagt geçenden soňra, “Mümkin, ol hakykatdan hem, haýsydyr bir möhüm zady satyn almalydyr. Ol menden şu çaka çenli asla pul soramandy ahyryn” diýip içini hümledipdir.
Oglunyň otagyna girende, ol eýýäm, düşegine geçen eken. – Oglum, sen entek ýataňokmy? – diýip, ol ýuwaşlyk bilen oglundan sorapdyr.
– Ýok, kaka, ýöne gyşaryp ýatyryn – diýip, ogly jogap beripdir.
– Göwnüme bolmasa, saňa gaty gödek jogap beräýipdirin öýdýän – diýip, kakasy aýdypdyr. – Dogrusy, men ýadaw bolanlygym üçin saklanyp bilmändirin. Meni bagyşla. Ine, seniň soran şol puluň, al!
Oglanjyk krowatyň gyrasynda oturyp: – Be.. kaka, sag bol! – diýip, ýylgyrypdyr.
Soňra ýassygynyň aşagyny dörüşdirip, birnäçe ýygyrt-ýygyrt kagyz pullary çykarypdyr. Kakasy oglundaky pullary görüp, ýene-de gaharlanyp ugrapdyr. Oglanjyk bolsa, ähli pullary üýşürip, dykgat bilen täzeden sanamaga başlapdyr.
– Özüňde bar bolsa, näme üçin sen menden pul soraýaň? – diýip, kakasy närazylyk bildiripdir.
– Sebäbi mendäki pullar ýeterlik däldi. Indi bolsa, bular laýyk bolar – diýip, oglanjyk ýylgyrypdyr. Soňra ol: – Kaka, indi bu ýetýär. Men seniň bir sagat wagtyňy satyn alyp bilerinmi? Seniň ertir işden bir sagat irräk gelip, meniň bilen garbanyşhanada agşamlyk edinmegiňi isleýärin – diýipdir.