Ökünersiň!

Gadryny bil eliňdäki bar zadyň,
Ýitireňsoň ahmyr çekip ökünersiň!
Gadryny bil ene-atanyň baryn,
Olar gitse gözýaş döküp ökünersiň!

Gaçyrma dostuňy saňa ynamdan,
Sözle ýagşy sözüň çyksa kalbyňdan,
Has wajypdyr dostuň seniň wagtyňdan,
Sen oňa wagt tap, ýogsa ökünersiň!

Sözümiz gelende bir gözel ýa:ra,
Söý ony! Kalbyna saldyrman ýara.
Zenan elmydama çyn söýgä zar-a,
Wagtynda söýmeseň soňra ökünersiň!

Dünýäňde parahat durmuşyň barka,
Gerekli ynsan bol, peýda ber halka,
Gadryny bil, entek watanyň barka,
Watansyz galaňda şonda ökünersiň!

Rahymberdi Suhanow