«Arzuwlan zamanaň geldi, Pyragy!» atly bäsleşik!


Bäsleşigiň düzgünnamasy:
Gahryman Arkadagymyzyň: «Magtymguly Pyragy sözüň güýji, gudraty bilen şygryýet äleminde ady arşa galan beýik şahyrdyr. Magtymguly Pyragynyň danalyga püre-pür şahyrana eserleri türkmeni, türkmen poeziýasyny dünýä tanatdy. Magtymguly Pyragynyň şygryýet dünýäsine diňe bir türkmen halky däl, eýsem, Ýer ýüzüniň beýleki milletleri hem hormat goýýar. Magtymguly Pyragynyň ajaýyp şygyrlary ähli nesiller üçin beýik taglymatdyr» diýip, beýik akyldaryň ruhy ummanynyň döwlet, halk, geljekki nesiller üçin syýasy älemdäki bahasyna ýetip bolmajak beýik taglymatdygy barada buýsanç bilen aýdyşy ýaly, Magtymguly Pyragynyň döredijiligi adatdan daşary bütewi we şonuň bilen birlikde, köpugurlydyr.

Türkmenistanyň Prezidentiniň 2024-nji ýylda Magtymguly Pyragynyň doglan gününiň 300 ýyllygyny bellemek hakyndaky Kararyndan ugur alyp, Berkarar döwletiň täze eýýamynyň Galkynyşy döwrüniň ýaş ýazyjy-şahyrlarynyň çeper döredijilige bolan höwesini artdyrmak, esasan-da, olary täze döredijilik gözleglerine we üstünliklere ruhlandyrmak maksady bilen, Türkmenistanyň Magtymguly adyndaky Ýaşlar guramasynyň Merkezi geňeşi bilen «Garagum» žurnalynyň redaksiýasy bilelikde «Arzuwlan zamanaň geldi, Pyragy!» atly döredijilik bäsleşigini yglan edýär.

Bäsleşige döwletimiziň her bir ýaş raýaty öz döreden çeper eserleri, ýagny hekaýalarydyr goşgulary bilen gatnaşyp biler. Bäsleşige iberilýän eserlerde Magtymguly Pyragynyň ömri we döredijiligi, şahyrana dünýäsi täze eýýamyň ruhunda giň beýanyny tapmalydyr. Kyssadyr şygryň žanr aýratynlyklaryna üns berilmelidir. Bäsleşige hödürlenen eserlere baha bermek üçin guramaçylar tarapyndan ýörite eminler topary düzülýär. Iberilen eserleriň döwrebaplygyna, çeper beýan edilişine, žanr aýratynlygyna üns berler. Bäsleşigiň ýeňijileri eminler toparynyň gelen netijesi boýunça kesgitlener. Bäsleşigiň jemleri 2023-nji ýylyň sentýabr aýynda jemlenip, ýeňijilere ýadygärlik sowgatlar, diplomlar hem-de höweslendiriji baýraklar dabaraly ýagdaýda gowşurylar.

Bäsleşige hödürlenilýän çeper eserleriň ýanynda oňa gatnaşyjy baradaky maglumatlar, işleýän ýa-da okaýan ýeri, salgysy we 3х4 ölçegli fotosurat bolmalydyr.

«Arzuwlan zamanaň geldi, Pyragy!» atly bäsleşige hödürlenilýän çeper eserler şu salga iberilmelidir: Aşgabat şäheri, Garaşsyzlyk şaýoly, 100-nji jaý, Türkmenbaşynyň erkin döredijilik mekany, «Garagum» žurnalynyň redaksiýasy.

Elektron salgymyz: garagum-zurnaly@online.tm
Habarlaşmak üçin telefon belgimiz: 38-61-83.

«Garagum».

ahal.info/tm

Arkadagly Serdar bilen ýaşlarymyz bagtyýar» atly döredijilik bäsleşigi


Dünýä türkmenleriniň ynsanperwer birleşiginiň hem-de «Türkmen dünýäsi» gazetiniň bilelikde guramagynda döwlet durmuşynyň ähli ugurlaryndaky bedew batly ösüşlerimizi, ýaşlarymyzyň gazanýan üstünliklerini, milli medeni miraslarymyzy wagyz etmek maksady bilen Arkadag Serdarly bagtyýar ýaşlar ýylynda geçirilýän «Arkadagly Serdar bilen ýaşlarymyz bagtyýar» atly döredijilik bäsleşiginiň

DÜZGÜNNAMASY

 Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda hemişelik Bitarap Watanymyzda il-ýurt bähbitli, halkara ähmiýetli köpugurly ägirt işler durmuşa geçirilýär. Milli medeni miraslarymyzy dünýä ýaýmak, halkymyzyň müňýyllyklaryň dowamynda sünnäläp döreden gymmatlyklaryny ýaşlaryň arasynda wagyz etmek, bagtyýar nesillerimizi milli ruhda terbiýelemek babatda netijeli işler alnyp barylýar.

 «Watan diňe halky bilen Watandyr! Döwlet diňe halky bilen döwletdir!» diýen şygary baş ýörelgesine öwren Arkadagly Serdarymyzyň yhlas-aladasy netijesinde Türkmen döwleti diňe bir ykdysady taýdan däl, eýsem, hiç mahal gaýtalap döredip bolmajak milli medeni gymmatlyklary bilen-de bütin dünýäde tanalýar. Bu günki gün giň halkara jemgyýetçiligi Türkmenistany il-ýurt bähbitli ägirt işleriň amala aşyrylýan, älemgoşar öwüşginli halylaryň, ýelden ýyndam bedewleriň, wepaly alabaýlaryň, saryja goýunlaryň dörän hem asyrlaryň dowamynda kämillik derejesine ýetirilen mekany diýip bilýärler. Halkymyzyň ynsanperwer däp-dessurlarydyr edebi, medeni gymmatlyklary hem ajaýyplygy bilen meşhurdyr. Onsoň, şeýle gymmatlyklarymyzyň ruhunda terbiýelenen ýaş nesilleriň ynsançylygyň iň gowy sypatlaryny özünde jemlän hakyky watançylar bolup ýetişjekdigine ynanýarys.

Bäsleşigiň maksady
Hormatly Prezidentimiziň başda durmagynda Arkadag Serdarly bagtyýar ýaşlar ýylynda döwlet durmuşynyň ähli ugurlarynda gazanylýan köpugurly üstünlikler, ýetilýän belent sepgitler, halkymyzyň ruhy dünýäsini açyp görkezýän medeni, edebi, taryhy gymmatlyklarymyz giňden wasp edilmegine mynasypdyr. Şu nukdaýnazardan, bäsleşigiň esasy maksady makalalaryň, hekaýalaryň we goşgularyň üsti bilen Berkarar döwletiň täze eýýamynyň Galkynyşy döwründe türkmen halkynyň Milli Lideri Gahryman Arkadagymyzyň hem-de Arkadagly Serdarymyzyň tagallalary bilen amala aşyrylýan köpugurly ägirt işleri töwerekleýin düşündirmekden; köpöwüşginli milli medeni miraslarymyzy halkymyzyň, aýratyn-da ýaş nesillerimiziň, dünýä türkmenleriniň arasynda wagyz etmekden; hemişelik Bitarap döwletiň Baştutany hökmünde hormatly Prezidentimiziň ynsanperwer işleriniň dünýäniň parahat ösüşlerine, halklaryň birek-biregi bilen ynanyşyp ýaşamaklaryna ýetirýän oňyn täsirlerini açyp görkezmekden; mukaddes Garaşsyzlygymyzdan soň ata Watanyny köňül nagmasyna öwren dünýä türkmenleriniň, şeýle hem her ädimde döwletimiziň özleri hakynda edýän aladasyny duýup, bagtyýarlykda ýaşaýan halkymyzyň eşretli durmuşyny beýan etmekden ybaratdyr.

Bäsleşigiň şertleri
— Kärine, ýaşyna seretmezden, her bir adam öz döreden makalasyny, hekaýasyny we goşgusyny bäsleşige hödürläp biler.

— Bäsleşige gatnaşyjylar iberýän eseriniň ýanyna özleri hakyndaky gysgajyk maglumaty (doglan ýyly, işleýän we ýaşaýan ýeri, hünäri, telefon belgisi) goşmalydyrlar.

— Eserler kompýuterde ýyglyp, iki nusgalykda (disk ýazgysy bilen) şu salga ýollanylmalydyr: Aşgabat şäheri, Garaşsyzlyk şaýoly-100, Erkin döredijilik mekany, «Türkmen dünýäsi» gazetiniň redaksiýasy.

— Bäsleşige hödürlenýän eserler 2023-nji ýylyň 25-nji awgustyna çenli kabul edilýär.

— Bäsleşikde ýeňiji bolan eserleri «Türkmen dünýäsi» gazetinde çap etmeklik meýilleşdirilýär.

— «Arkadagly Serdar bilen ýaşlarymyz bagtyýar» atly döredijilik bäsleşiginde ýeňiji bolanlar Hormat hatlary we sowgatlar bilen sylaglanylýar. Baýraklaryň maliýe çykdajylary Dünýä türkmenleriniň ynsanperwer birleşigi tarapyndan üpjün edilýär.

— Bäsleşigiň guramaçylyk işlerini Dünýä türkmenleriniň ynsanperwer birleşigi we «Türkmen dünýäsi» gazeti ýerine ýetirýärler.

Bäsleşigiň jemini jemlemek
— Eminler topary bäsleşige gelen makalalara, hekaýalara we goşgulara aýratynlykda serederler hem-de ýeňijileri kesgitlärler.

— Bäsleşigiň jemleri 2023-nji ýylyň sentýabrynda jemleniler.

Dünýä türkmenleriniň ynsanperwer birleşigi,
«Türkmen dünýäsi» gazeti.

www.turkmenmetbugat.gov.tm
"Türkmen dünýäsi" gazeti, 22.03.2023

«Berkarar döwletiň täze eýýamynyň Galkynyşy döwri: türkmen obasynyň täze keşbi» atly döredijilik bäsleşigi


Golaýda «Türkmenistan» gazetiniň redaksiýasy Arkadag Serdarly bagtyýar ýaşlar ýyly, beýik Garaşsyzlygymyzyň şanly 32 ýyllygy, şeýle-de hemişelik Bitaraplygymyzyň 28 ýyllygy mynasybetli Türkmenistanyň Agrar partiýasynyň Merkezi Geňeşi bilen bilelikde «Berkarar döwletiň täze eýýamynyň Galkynyşy döwri: türkmen obasynyň täze keşbi» atly döredijilik bäsleşigini yglan etdi.

Bäsleşige hödürlenilýän işlerde Garaşsyz ýurdumyzyň özygtyýarlylygynyň ykdysady esaslaryny pugtalandyrmaga gönükdirilen möhüm strategik maksatnamalary durmuşa geçirmegiň çäklerinde amala aşyrylýan ägirt uly işleriň düýp mazmuny we ähmiýeti anyk mysallar arkaly açylyp görkezilmelidir. Düzgünnamada bellenilişi ýaly, bäsleşige gatnaşmaga isleg bildirýänler oba durmuşy, obanyň taryhy, onda uly yz goýan belli şahsyýetler hakynda-da ýazyp bilerler. Eserler oba medeniýet öýleri, milli gymmatlyklary aýratyn sarpalaýan adamlaryň öý muzeýleri, uzak ýaşly ýaşaýjylar barada hem bolup biler. Täze döwrüň giň mümkinçiliklerinden netijeli peýdalanýan daýhan hojalyklary, öňdebaryjy daýhan birleşikleri, tejribeli daýhanlar, şol sanda ussat bagbanlardyr pileçiler baradaky makalalar hem bäsleşige kabul ediler.

Oçerkler jemgyýetiň öňdebaryjylaryna, uzak ýyllaryň dowamynda ýurdumyzyň ösüşlerine mynasyp goşant goşup gelýän döwürdeşlerimize, zähmet adamlaryna bagyşlanmalydyr.

Bäsleşige hödürlenilýän işler we awtor baradaky gysgaça maglumatlar şu ýylyň 15-nji dekabryna çenli guramaçylyk topary tarapyndan hasaba alnyp, dekabr aýynyň soňky ongünlüginde jemlener. Ýeňijilere Türkmenistanyň Agrar partiýasynyň Merkezi geňeşiniň diplomlary we gymmat bahaly sowgatlary, tapawutlanan eserleriň awtorlaryna bolsa höweslendiriji baýraklar gowşurylar.

Bäsleşige hödürlenilýän işler elektron nusgada «Türkmenistan» gazetiniň redaksiýasyna (Aşgabat şäheri, Garaşsyzlyk şaýoly, 10a0, Türkmenbaşynyň erkin döredijilik mekany) ýa-da elektron poçtasyna (turkmenistan-gazeti@online.tm) degişli bäsleşigiň ady bilen ugradylmalydyr. Olaryň arasyndan iň gowulary saýlanyp-seçilip gazetde çap ediler. Bäsleşige gatnaşmaga isleg bildirýänler redaksiýa ugradýan eserlerine özleri baradaky maglumatlary (işleýän ýa-da ýaşaýan ýeriniň salgysy, telefon belgisi) hem goşmalydyrlar.

Habarlaşmak üçin telefon belgisi: 39-95-67.

“Türkmenistan” gazeti, 06.06.2023

www.turkmenmetbugat.gov.tm

«Diýarda» Diýaryň waspy» atly döredijilik bäsleşigi yglan edildi

Türkmenistanyň Kärdeşler arkalaşyklarynyň Milli merkezi we «Diýar» žurnaly «Diýarda» Diýaryň waspy» atly döredijilik bäsleşigi yglan edildi.

Bäsleşikde tebigatyň we daş-töweregimizi gurşap alýan dünýäniň gözelliginden ylham alýan žurnalistler, döredijilik adamlar gatnaşyp bilerler.

Hödürlenilýän eserlerde Türkmenistanyň täsin gözel tebigaty, taryhy we medeni ýadygärlikleri çeper beýan edilmeli. Materiallar türkmen, iňlis we rus dillerinde taýýarlanyp bilner.

Arzalara ýaşaýan we iş ýeriňiz, telefon belgiňiz, şeýle hem käriňiz barada maglumatlary goşup, 2023-nji ýylyň 31-nji awgustyna çenli diyar-zurnaly@online.tm elektron poçta salgysyna ibermelidir.