Meňli hanym golun dişläp,
Bizden ki uýat eýleýir.
Kä daranyp, uz ýörişläp,
Bizden ki uýat eýleýir.
Aşyk, gulak goýgul söze,
Syýa zülp ýaraşar ýüze,
Sürme çekip gara göze,
Bizden ki uýat eýleýir.
Geýinipdir gyzyl-aly,
Bilmen nedir ýar hyýaly,
Göz edip ýomut, ahaly,
Bizden ki uýat eýleýir.
Ykbal çapmaz, ýöreý diýsem
Ýokdur malym, bereý diýsem
«Aç, roýuňy—göreý!» diýsem,
Öwrülip uýat eýleýir.
Görüşeli, Meňli hanym —
Istihanym, şirin janym!
Pyragy diýr, din-imanym
Ýetdirmez, uýat eýleýir