Yşk dünýäme dogan gün sen,
Güneşimiň nury sende.
Kalbym galkýa birje gülseň,
Arzuwlarmyň bary sende.

Hyýallarma çykdyň eýe,
Kömege gel dertlem duýa,
Ömrüm berjek bir sen diýe,
Aşyk ýürek ýary sende.

Ýürek syryň eýle aýan,
Men bolaýyn sarsmaz gaýaň,
Keşbiň bezär uýat haýaň,
Ýigdiň namys ary sende.

Müňden birin saýlap söýsem,
Birehim sen ýanyp köýsem,
Müň hyýalda söýýän diýsem,
Gyşyň aňzak gary sende.

Sen gülleri bakja bagyň,
Ýüregimde galdy dagyň,
Ýalňyz gussa batan çagym,
Dutarymyň tary sende.

Senden gizlän syrym bolmaz,
Hiç ejizlän ýerim bolmaz,
Onda özgä orun bolmaz,
Ýüregimiň töri sende.

Taryp etsem yşga düşüp,
Şanyňa goşgular goşup,
Sensiz ýürek bilmez joşup,
Şygyrlarmyň gory sende.


Süleýman Tekäýew