Hergiz ýalan sözlemegin,
Menden syryň gizlemegin.
Seniň ýeke dostuň bardyr,
Olam beýik Biribardyr.
Her gelene ynanmagyn,
Gülüp ýöre, gynanmagyn.
Dostlaryň göwnüne degme,
Başyň belent bolsun, egme.
Syr bereniň syryn sakla,
Kişiniň ynamyn hakla.
Kalbyňy mydam tämiz tut,
Öýkedir-kinäni unut.
Dost-dogany ýat etmegin,
Duşmanlary şat etmegin.
Diňle meniň diýen sözüm,
Dogry ýoldan ýöre gyzym.