Sahawatly Gadyr gijesini özünde jemleýän Oraza aýy haýyr-sahawatyň rowaçlanýan aýydyr. Remezan aýynyň 27-nji gijesi Gadyr gijesi hökmünde bellenilýär. Bu gije, mübärek gijeleriň iň belent mertebelisidir we “Gijeleriň Soltany” diýlip atlandyrylandyr. Gadyr gijesiniň mukaddes we bereketli gijedigi barada Gurhanda şeýle diýilýär:
“Biz Gurhany Gadyr gijesinde indirdik. Gadyr gijesiniň nämedigini bilýärmiň? Müň aýdan has haýyrlydyr Gadyr gijesi. Ol gije Rebbiň rugsady bilen perişdeler her dürli iş üçin iner durar… Eýýäm şol gije aman-esenlik dowam eder.. tä daňa çenli.“
Mälim bolşy ýaly, Allatagala şu synag dünýäsinde möhüm zatlary gizläp goýupdyr. Şonuň üçin Oraza aýynda-da Gadyr gijesi gizlenipdir. Muhammet Pygamber Gadyr gijesini Remezanyň soňky on gününiň täk gijelerinden (21, 23, 25, 27-nji gijeler) gözlemelidigini aýdypdyr. Ýöne 27-nji gijäniň Gadyr gijesidigi hakynda aýratyn nygtalyşy ýaly, alymlaryň aglaba bölegi hem şeýle kabul edipdir we tutuş yslam äleminde 27-nji gijäni Gadyr gijesi hökmünde gutlamak däbe öwrülipdir.