Durnaň gözi ýaly dury dünýäň bar,
Sende men bar. A meň uly dünýäm bar.
Sesiňi eşdemde aladam sowlup,
Diňe senli pikirlere çümýän, ýar!

*  *  *

Söýdüň bakman artygyma, kemime,
Şärik bolduň şatlygyma, gamyma.
Ruhumy göterdiň asmana garşy,
Men söýgimi jar ederin zemine.

*  *  *

Seýkin-seýkin ädimlerňe döneýin,
Iki kalbyň aýdymlarna döneýin.
Bu jahan gözüme şeýle bir eziz:
Dag-daşyna, adamlarna döneýin.

*  *  *

Büs-bütin ýer etdiň ýadymy, dünýäm,
Göreçleň dogamy, jadymy, dünýäm?
Didäňdäki alaw söýgidenmi ýa
Dowzahyň birehim odumy, dünýäm?

*  *  *

Gülseň, ýüregimde gyzyl gül biter,
Göreçleň peýkam deý içimden öter.
Mundan kemem, artyk söýgem gerek däl,
Şu söýgiň, melegim, ömrüme ýeter!


2013ý.


Sapa HOMMADOW