Ýeke bakyş bu köňle,
Zulmat boldy-la, dünýäm.
Gözleň kä ataş, käte
Jennet boldy-la, dünýäm.

Guwdum deňzinde yşkyň,
Birden saňa sataşdym,
Ykbalyma gül keşbiň
Çeňňek boldy-la, dünýäm.

Ýanmyşam yşk alawna,
Söýýän diý, gel golaýma,
Ýeke sözüň ne beýle
Gymmat boldy-la, dünýäm.

Bir perwana öwrüle,
Ýanyp barýan, heý göre,
Duýgular sen serwere
Ymmat boldy-la, dünýäm.

Gözleriňe aldana,
Baglandymmy salgyma,
Yşk gülleri kalbyma
Ýandak boldy-la, dünýäm.

Haýyşym, söýme diýme,
Galmasyn kalpda kine,
Bu söýgi on ýedime
Kysmat boldy-la, dünýäm.

Arşdan arap-aýanym,
Gowuşmazmy azabym,
Niçün maňa jogabyň
Dymmak boldy-la, dünýäm.