Bakyşlaňdan nura dolýar gursagym,
Serim sermest sözleriňden, sesiňden.
Näçe wagt ýaýdanmak bor, eý aman,
Näçe wagt guwanmaly kesäňden?!

Gudrat inäýmezmi dilime bir gün,
Takatym paýawlap barýar assadan.
Ýüregim şeýle bir howlugýar, dünýäm,
Halas bolmak üçin gamdan, gussadan.

Sen, ýene sen, soňam ýene sen, sen, sen...
Ine, meniň ýüregimiň sedasy.
Söýgi huzurynda direnip durka
Ýok ekeni alçaklygyň peýdasy.

Büs-bütin eýeläp aňym, ýadymy,
Hökmürowan boldy düşen heserim.
Aýdylmadyk söýgim saňa itse-de,
Ýaýdanjaňlyk dur öňümde keserip.

2012ý.


Sapa HOMMADOW