Pursatlar – suw üzre aýagyz kibi...
Aýt sen, wagt diýeniň aýaýar kimi?!
Ýazlar gül geýinip, ulugyz kibi
tijenende sen düşýärsiň ýadyma.

Asmanda ýazylan ýerde çözülmez.
Köňle taý kylanyň derde dözülmez.
Penjire ýapylmaz, perde süzülmez
gijelerne sen düşýärsiň ýadyma.

Kalp – tez jeren, awy däldir her şiriň,
Günleň tesbisinde ömür teswiriň.
Alaja deý...
düýn, şu günüm, ertirim
Işilende sen düşýärsiň ýadyma.

Ýaşlygy perinde göterip guwlar,
Sowlar, bir pursatlyk bahar deý sowlar...
...Toý güni bir-bire iň hoş arzuwlar
diýşilende sen düşýärsiň ýadyma.

Yşkyň sabyr pyýalasyn gyrmalap,
Ýazyklydyr ýar ýanynda ýygralan...
Bir ýyly söz ähli derdim bir gyra
süýşürende sen düşýärsiň ýadyma.

Söýmäge – bir pursat, köýmäge – ömür.
Diýmäge – birje söz... duýmaga – köňül.
Daň ýyldyzy kibi,
her täze günüň
işiginde sen düşýärsiň ýadyma.

Göräýmäge, durmuş düzläp dokuzyn,
Günler çalar şo-ol adaty gopuzyn...
Ýöne...
dost-ýar, dogan-gardaş... gözler dokunyp,
üýşülende sen düşýärsiň ýadyma.


Kakamyrat REJEBOW