Ýaz gelse,menem özüme adatyja pişämi tapynýaryn.Her gün işden gelip mellek ýerimizdäki hapa-haşal otlary ýygmaga oturýaryn.Özümizde ne ownuk,ne iri mal bolmanlygy sebäpli, ýygylan otlary gerekli goñşulara hödürlemek adatymyz bar.
Şeýle günleriñ birinde ejem goñşy köçämizdäki aýalyñ ogluna mallary üçin taýýar ýygylan otuñ bardygyny aýtdy.Oglan "Almaga geleris"diýse-de,ondan habar-hatyr bolmady.
Ine,düýn welin, öýlän töwereklerde gapymyz kakyldy.Seretsem,şol oglan.Arabasyny alypdyr-da, geläýipdir."Ejeñ ot bar diýdi" diýip,boýnuny burup dur.Wah,men oty gysganamok-la,ýöne şol günüñ düýn-öññininde bolanja oty daýymyñ ýeñil ulagyna ýükläp,şolara baka ugradaýmarysmy?!
Men oglanyñ özündenem beter oñaýsyz ýagdaýa düşüp,ahmyr bilen hyrçymy dişledim:"Wah,jigim,otuñ bardygyny aýdanymyzdan soñ 3-4 gün geçdi ahyry.Şol wagt gelmeseñ,başga kişä berýäs-ä."
Diýsem diýdimem welin,onuñ raýyny ýykmazlyk üçin mellek ýerime aýlandym.Iki üýşmejik guran ot çykdy.Ojagaz otlar bilen arabasynyñ dolmajagyna göz ýetiren oglan terje otlardan özi ýygmaga oturdy.
Onuñ hyrçyny dişläp,ot ýygyşyny penjireden synlap oturşyma, içki dünýäme çümüp gidipdirin.
...Bizem ýüregimizde käbir adamlar üçin oñat duýgular üýşürip goýýarys.Emma näme üçindir şol adamlar bu duýgulara wagty bilen üns bermeýärler.Ine-de bir günem,hälki oglanyñ gapymyzy kakyp,ot soraýşy ýaly ýüregimiziñ gapysyny kakýarlar-da "Şo-ol duýgularyñdan ýokmy?"diýip soraýarlar.Emma üstünden geçen ep-esli wagt zerarly duýgularymyzam edil otlar ýaly guraýar.Onsoñ,oglanyñ ter oty ýygyşy ýaly şol adamlaram bu duýgulary azap edip täzeden döretmeli bolýarlar.Käsi,şol oglan ýaly ýalñyşyna düşünip, ýaltanman azap çekýärler,käsi bolsa başga biriniñ ýüreginde üýşürlen duýgulara tarap at salýarlar...
...Bu gün oglanyñ ot ýygan ýerine aýlanyp gördüm.Otlar ýüzleý ýygylypdyr,yzynam dökän-saçan edip gidipdir."Haý,señ ot ýygjak bolşuñ gursun!"diýip hüñürdänimem duýman galypdyryn.Aý,howwa-da bu ýerde geñlär ýaly zadam ýok,men-ä mellegiñ arassaçylygynyñ aladasynda,ol bolsa malynyñ garnyny doýurmagyñ...

@Mümkin