Iki aýal bir çaganyň üstünde
dawalaşyp,barýar şanyň arzyna.
Pygamber hem haýal etmän,dessine
çykanmyşyn dergähiniň agzyna.

Soranmyşyn: - Ýeri,näme dawaňyz,
Jedeliňiz näme?Aýdyň siz derrew...
Bir aýal ýüzüne bakyp çaganyň,
Diýýär: - Men dogurdym,hiç kime bermen...

Soň beýleki aýal sözleýär assa:
- Bu çagajyk meniň eziz balamdyr.
Ol menden aýrylyp,başga ýurt tutsa,
dünýäni göçürjek ahy-nalamdyr...

Şeýdip,iki aýal deň dawagärmiş.
Süleýman Pygamber ähli dawany
Örän adyl,örän dogry çözýärmiş.
Ýeri,kime bermeli bu balany?

Pygamber oýlanyp durýar ep-esli,
Iki aýalyň haýsy hakyky ene?
Soňra bolsa çykarmazdan sesini
Öz almaz gylyjyn alýar ol ele.

Diýýär: - Häzir ikä böljek çagany,
Her haýsyňa onuň deň ýary ýeter. -
Hem gülüp,hem aglap birinji aýal,
Öz-özi hoş bolup,ýylgyrýar ýeser.

Başyn aşak salyp,ikinji aýal,
Diýýär: - Şahym,öldürmäň siz çagany.
Ony siz dawagär aýala beriň,
Menem göge götermäýin nalamy.

Çagam diri galsa,şol hem bes maňa,
Kimde bolsa bolsun,ýöne ölmesin.
Goý,ulalsyn özgäň öýünde,belki,
Ýigit çykyp,tanar garyp enesin...

Şonda göz ýetirýär adyl şa olaň
Haýsynyň çagany dograndygna.
Bu waka bolupdyr on müň ýyl ozal,
Çyn ene gowşupdyr oglanjygyna.

Atamyrat Atabaýew