ÝAGYŞLY GÜN

Ýagyşly gün,
Gaýdyp gelýän okuwdan,
Garşy aldy ýene tanyş duralga.
Gözüm düşdi şonda
Içiñ hümledip,
Bir çetdejik ýagşa ezilip duranña.

Synlap dursuñ, yşga düşen asmanyñ
Joşlaryna sygman aglaýanyny.
Men bolsa ýuwaşja saña süýşdüm-de,
Tutdum señ üstüñe saýawanymy.

Tisgindiñ.
Men has-da ýitirdim özüm:
"Aý ýöne-le... ezilipsiñiz... Bagyşlañ"
Soñra ne men gürledim, ne sen zat diýdiñ,
Durus aýdymyny diñläp ýagyşlañ.

Soñra bolsa, ýitip gitdiñ gözümden,
Birden gaýyp boluşy deý hüýrleriñ.
Sen bilýänem dälsiñ, şojagaz pursat,
Bu gursaga aýdym bolup gireniñ.

Bilýärmiñ, sadaja jemalyñ bilen,
Dünýämde üýtgeşik dünýä açanñy.
...Şondan bäri seni agtaryp ýörün,
Gowşurarsyñ diýip onuñ açarny.

...Ynha, ýene ýagyş, ýene duralga,
Golumda-da şo-ol "mukaddes" saýawan.
Sen bu ýolda ýene sataşaýmazmyñ,
Bir pursatda ýüregimi paralan?!

Kakamyrat Rejebow.