DAŞARY ÝURTDAN GELEN TÜRKMENIÑ AŞGABATLY GARYNDAŞY BILEN SÖHBETI

—Eýesin depermiş semrände eşek.
—Aý, öz eşegmiz-dä, gylaw alýa-da.
—Hany, namysa-da ýeten ýaly şek?
—Aý, namysdan ölen barmy, bolýa-da...

—Millet guldan beter ezilýän eken.
—Ýene şükür, türme mundan aňsatmy?!
—Adam hukuklary bozulýan eken.
—O diýýäniň näme, iýilýän zatmy?!

—Gabra itýärmişler ýuwaş-ýuwaşdan,
—Aý, göni gyrmaga çekinerler-dä.
—Saňa nä ýetenok bolelin aşdan?!
—Aý, bir boldum edip, çekilerler-dä.

—Duluňdaky saçagam-a boş ýatyr!
—Aý, iliňem bizden artyk güni ýok.
—Alnyňda bahar ýok, diňe gyş ýatyr!
—Aýlawly gürleme, hiç zat bilemok.

—Öýüň iç-daşam-a kirmi, hapamy?
—Oňa derek asmanymyz arassa.
—Haçan doýurjak ol ýeke gapany?
—Aý, iýse-iýsin-dä, ýetim neresse.

—Bilýäňmi haýwanyň iň bir mekirni?
—Goýsana şu gepi, gözüm çekedir.
—Dur onda, Hudaýyň ikimi, birmi?
—Allajan ýekedir, özem—tekedir!

Şirаly NURMYRADOW.

Çeşme: kitapçy.com