Ýagyş,
ýa-gyş,
ýa-g-y-şşş...
şabrap, şabraşyp
Begenjine adyn aýdaýjak bolýar.
Bulut dag gerşine garnyn garnadyp,
Ýeriň depesinden yňdarlyp gelýär.

Asman nagra dartýar, çakýar ýyldyrym,
Naýzalap ýagmyrdan doly tulumyn:
Bir demde dünýäni ýylatsam diýýär,
Bir demde boşatsam diýýär buludyn.

Gyşdan doňup çykan derýaň suwuna
Şabrap-şabrap ýagyş özüni urýa.
Bahar bormy çykarmasa hanaňdan?
Ýaz özüne hiç kim sygmaýar, derýa!

Baharyň deminden etegin ýygryp,
Gaçyp daga çykan ak garly gyşy
Ýagyş ýaza öwrüp, buluda öwrüp,
Şagladyp goýberýär zemine garşy.

Hol gyzy,
hol ýigdi,
jübdi, ýalñyzy,
Biparh ýöräp barýan şol gamgyn gelni
Suw bilen däl, ylham bilen,ýaz bilen
Ýagyş ýuwsam diýýär dabanna çenli.

Ýöne her kim,
her kim busýar jaýyna
Ýa bukulýar saýawanyň astynda.
Heý, şeýdip jebr etmek bormy janyňa,
Heý, nämeden gaçýañyz siz aslynda?!

Bolmajagyn bilip jansyz üçegi
Şaglap-şaglap ýumruklaýar badyna.
Soň aýna ýarmaşyp,
ýarym-ýaş bolup
Adam! Ýagyş aglaýar seň halyňa!

Nobatguly Rejebow.