Ýol üstünde dökülipdir arpa dänesi,
Şineläp kök urdy birje sanysy,
Ýöne depgilendi çykan şinesi,
Umyt edip diýdi:Ýaşasym gelýär

Islegi hamana kabul deý, bolup
Gögerdi, az salym, garyş boý alyp,
Hiç kim üns bermedi... Ýene basylyp,
Ýykyldy.
Diýdi ol: Ýaşasym gelýär.

Ýagdy gyşyň gary, Baharyň ýagşy,
Ýenede boý aldy, öseni ýagşy,
Wah, ýol üstünde depildi başy,
Ýuwaşja seslendi, Ýaşasym gelýär.

Ysgynsyz galdyrdy, başyny ýaýkap,
Ýüreginiň köküni, ýer bilen oýkap,
Şemalam, sümmälän başyny çaýkap,
Ýykdy ýere, gygyrdy: Ýaşasym gelýär.

Belki durmuş berendir şeýleräk bagty,
Ýa belki gögerindir bimahal wagty,
Hiç-kime nesip etme depgeşek tagty,
Şonda-da her hal men ýaşasym gelýär.

Ýaşasym gelýär, aýlanyp, dönüp.
Şatlyga guwanyp, gaýga gynanyp,
Bulançak derýanyň suwundan ganyp,
Şeýle mähir bilen ýaşasym gelýär.

Hiç bolman uçsadym, Asmana sary,
Guçsadym söýgim bilen mähirli ýary,
Bu durmuş geçsede, göýä düýş ýaly,
Damaryndan emip ýaşasym gelýär.

Bagt bir -arzuwyň hasyl bolmagy,
Arzuwam - köňüle hyýal gelmegi,
Hyýallansa ýürek goýmaz urmagy,
Soň nädip aýtjak däl... Ýaşasym gelýär.

Ýaşasym gelýär, gark bolup dünýä,
Goý şeýle pursata galsynlar haýran,
Geljek üçin hyzmatymy aýaman,
Geçmişden sapak bolup, ýaşasym gelýär,

Baharyň howasyn ömrüme sorup,
Barýaryn ýuwaş-ýuwaş saralyp-solup,
Tomusyň jokrama yssysy gelip,
Dänelerim döküp, ýaşasym gelýär.

Depilsede getirdi jöwher hasylyn,
Ýere dökdi, olaň iküç sanysyn,
Özi bolsa gara ýere garylyp,
Soňky sözi boldy, Ýaşasym gelýär.