MEN SENIŇ DÜNÝÄŇDE GALASYM GELÝÄR

Men seniň dünýäňde galasym gelýär
Hem ganasym gelýär yssy mähriňden.
Öçügsi umytlam biraz janlanýar,
«Seni ýitirmerin» diýen ähtiňden.

Men seniň dünýäňde galasym gelýär,
Ornaşasym gelýär seniň ýadyňa.
Sen bolmasaň kim ýetişer, ezizim,
Duman örten duýgularmyň dadyna?

Men seniň dünýäňde galasym gelýär,
Duýdurasym gelýär bir ýerde barym.
Hem aýdasym gelýär Aýyň astynda
Hiç kese dözmedik sözlermiň baryn.

Men seniň dünýäňde galasym gelýär,
Mende göwnüň ýokdugyny bilsem-de.
Ýöne garaş.
Bir gün sensiz günleriň
Perdesini ahyrsoňy böwserin-de,
Ýaşaryn söýgini süňňüme öwrüp,
Her eşdemde howsalamy artdyran —
adyň ýöňkemede menlige öwrüp.


GEL, HASAPLY BOLALY!

Gel, hasaply bolaly!
Goý, uzaga gitsin täsin duýgular.
Öwrendim men söýgiň kadalaryny,
Eýýäm oňa bolup barýan uýgunam.
Gerek muny duýmagyň.

Gel, hasaply bolaly!
Gijeleri çirim etmän geçirdim:
Seň zaryňy çekip, gaýtalap adyň,
Oňa derek has uly bagt eçil sen.

Geçir sen yşkymy  kalbyň törüne,
Öçür, eger şonda söýgi barmasa.
Indi öwezini söýülen günleň
Söýgi bilen doldurmaga alňasa.

Gel, hasaply bolaly!
Emma şatlygymyz bolsun hasapsyz.
Meniň arzuwlarmy geçir durmuşa,
Hyýalymda bagtly geljek ýasapdym.

Zyýany ýok, zeýren kejirligimden,
Ejizje ýüregim mätäç goraga.
Gel, hasaply bolaly!
Ýöne meniň senden birje haýyşym:
Seni niçik söýýänimi sorama.


GORKY

Gezip ýörsem, bolup ýörsem
Bady alnan çaga ýaly.
Geçmişiňde söýen gyzlaň,
Näme, elin galgaýamy?

Başarmasam unutdyryp
Kalbyň öňki eýesini,
Eýeli jaýda ýaşan dek,
Ýetip dursa teýenesi.

Ýetibem arzuwlaryma,
Günler gussamy kemmese,
Geçmiş bilen werziş bolup,
Söýmäge eliň degmese.

Haraý isläp töwerekden,
Dört diwara bolsam bakna…
Hawa, senli hemem sensiz
Takdyrymdan juda gorkýan.


Altyngözel AMANMÄMMEDOWA