Dostuma

Şir sen,
bradarym,
mert sen,
merdana,
Emma zamanasy gelmeýär merdiň!
Razysyň söweşip janyň bermäne,
Emma tüpeň kandan geçjek —
bilmersiň!

Ir dana bor bu dünýäniň örtäni,
Bu dünýä däl,
bu — şeýtana tomaşa.
Tohum ite — berer gülli körpäni,
Bedew ata — oklar etli omaça.

Rehmi ýokdur,
garaşmagyn kömege,
Heňňam heleý kysmy öwsüp durýandyr.
Düýn saňa ýalynyp gezen kölege
Erte —
işgil salyp idip barýandyr.

Leňkebut toruny guran dünýädir.
Pelek möý kerebin orandyr serňe.
Isa bolaý — ilki haça çüýlärler,
Soňam pygamber diýp ederler sežde.

Ynha, dostum, ýaş toýuny edýärsiň,
Öweý dünýä saňa jahan deý darka.
Seniň doglan günüň toýlamaň näme,
Ýas tutup ýörmeli ýagdaýyň barka?!
1979 ý.

Nobatguly Rejebow